Բան ՁԱ

Ա

Ընդ Աստուածածնին մաղթանաց՝ ահա եւ զվերնոցն

Անմահ հրեշտակացն լուսակերպից զաղերս հայցուածոց,

Որ վասն իմ գոչեն առանց լռելոյ

Հանապազորդեան արգահատութեամբ մաքուր բերանոց,

Ընկա՛լ, բարեգութ։

Որք են բարիք, բարեգործեալք ի բարերարէդ,

Անկիրթք՝ չարեաց, հաստեալք յամէնիշխան հրամանաց էիդ

Զաւրութիւնք հզաւրք՝ ակնարկութեան բարձրելոյդ,

Սուրբք, մաքուրք, անարատք, աւրհնեալք,

Վայելչականք, յաղթողք եւ անպարտելիք

Եւ ըստ ընթացից տեսութեան մտաց՝ արագունք։

Որք եւ պտղակորոյս տնկոյ թզենւոյն՝ եռամեանն դատարկութեամբ,

Որ զբնաւ յաւիտեանս պարունակէ ժամանակն՝

Զանցեալն ընդ ներկայիս եւ ընդ ապառնոյն,

Յամայր յամրութեամբն յերկարաձգելոյ,

Յայգի աշխարհիս արմատացելոյ,

Սին սաղարթիւն պաճուճելոյ՝ զրկեալ ի պտղոց,

Որ է ճշգրիտ պատկեր թշուառ մարդկութեանս,—

Սոքա բարեխաւսք, հանդերձիչք, այլ եւ խնամակալք,

Որ դեգերին հանապազ առ մեզ՝

Ընդ մերում կրիցս կարեկցելով,

Բարեմասնութեանն մեր սպասեն

Եւ յաւիտենականն կենդանութեամբ փրկութեանն մեր աղաւթեն

Զայս բան ասելով՝ Զգործս ձեռաց քոց մի՛ անտես առներ։

Քանզի, արդարեւ, մեր են այս աղաչանք,

Ի բարերարէդ աստուծոյ վասն մեր կարգեալ առ նոսա,

Զի նոքա բանիւ են ստեղծեալ,

Եւ մեք՝ ձեռաւք ներգործեալ։

Որք եւ գալոց են ընդ միածնիդ

Վկայք սոսկալիք դատաստանին հատուցման,

Ճշմարտաբան դատախազք յանցաւորութեան երկրայնոցս,

Յահաւորին ատենի՝ յայտնիչք իրաւամբք

Զմատակարարութիւնն, որ առ մեզ,

Որք եւ անդանաւր կարեկցեն՝ ազդեալ հառաչմամբ

Զմշտանուէրն նուագ ձայնի.

Ողորմեա՛, դու ստեղծեր, մի՛ կորուսաներ։

Բ

Արդ, ընդ գոհաբանութեան ձայնիցն

Խնդրուածոց անմահականացն վեհից՝

Եւ ի մեր հեծութիւնս հոտոտեսցիս, բնաւից արարիչ,

Որ յաղթես գթութեամբդ քո վերնոցն եւ ստորնայնոցս,

Քանզի քո է բարերարելդ առ մեզ եւ առ նոսին։

Արդ, վասն բարեզարդութեան անախտականացն,

Հրաշատեսիլ հրակերպիցն, անշաղախ մաքրոցն,

Անմեղիցն, բոցանիւթիցն, հոգեղինացն եւ անվանելեացն,

Ամէնաճեցուն առաւելութեամբ ի բարձրն ընտրականութիւն,

Գերափայլ յաճախ գիտութեամբ,

Անցուրտ ջերմութեամբ ջեռուցանողք

Ինքնաբուն տապովն աստուածսիրութեան,

Ըստ ինքեանց զմերս սառնասեր սրտից անբորբոք շիջումն՝

Այրիլ անաղաւտ ի մեծախորհուրդ սրբում սեղանիս,

Որ ի խորանիս,

Առանց նիրհելոյ եւ դանդաղանաց

Սպասել հրամանաց երանականաց

Կեցուցիչ կամաց ամենաստեղծիդ՝

Քերոբէաւրէն առաքինութեամբ

Յաստուած միացեալք անբաժանելի։

Որք երկնաւոր պետութիւնք են մեծք

Եւ զինուորութիւնք անբիծք, ահաւորք,

Երկնաւորիդ աստուծոյ ազատազնեայ պաշտաւնեայք,

Ի յամպոյդ լուսոյ ցաւղք նշուղից։

Գ

Որովք եւ ինձ՝ մեղաւորիս հողեղինի

Մարդասիրեսցես ողորմել, Յիսուս,

Աղաչանաւք իմոյն հրեշտակի՝

Դարձուցանելով զիս, տէր, ի բարիդ քո հետս լուսոյ,

Զի զաւանդ հոգւոյս իմ պաշտպանութեան,

Զոր հաւատացեր նմին տեսչութեան,

Զընկալեալն ի քէն ի կենցաղ աստեացս՝

Ուրախութեամբ սրտիւ յիս բերկրեալ,

Անմեղադրելի առ ի քէն աւրհնեալ,

Խնդալից դիմաց զուարճութեամբ քեզ,

Արքայ բարձրութեան փառաց անհասից,

Ի խրախճանս կենդանախումբս բերկրեցելոցն պարուց

Մատուցեալ ընծայեցուսցէ, գովեալ ողորմած,

Եւ քեզ, անքնին, ընդ Հաւրդ անհասի,

Թուակցութեամբ Հոգւոյդ անճառի,

Վայել է փառք, պատիւ եւ երկրպագութիւն

Յաւիտեանս յաւիտենից։

Ամէն։